Isuf Kurtaj
Shqipëria nuk është prekur akoma nga kriza globale, dhe kjo, jo për meritë të planit anti krizë të qeverisë, por për meritë të emigrantëve shqiptar, që vazhdojnë të sjellin lekë në vend. Ky në fakt është konkluzioni që OSBE ka nxjerrë gjatë konferencës ku morrën pjesë rreth 170 përfaqësues nga 69 vende, si dhe përfaqësuesit e trupit diplomatik të akredituar në Tiranë. Kreu i Prezencës së OSBE-së në Tiranë, ambasadori Robert Bosch u shpreh se migracioni, që në rastin e Shqipërisë “është më shumë emigracion”, është një çështje me rëndësi për ekonominë dhe jetën e përditshme të vendit. “Besoj se kjo çështje është me rëndësi kyçe nisur nga fakti se rreth 700 mijë shqiptarë punojnë jashtë, veçanërisht në Greqi dhe Itali, ku të gjithë ata realizojnë një funksion të rëndësishëm e shumë të nevojshëm në ekonomitë respektive kombëtare”, u shpreh ambasadori Bosch në fjalën e mbajtur sot në ditën e parë të Konferencës së Dytë Përgatitore të Forumit të 17-të Ekonomik dhe Mjedisor të OSBE-së që po zhvillon punimet në Tiranë. “Statistikat më të fundit tregojnë se remitancat e dërguara prej këtyre emigrantëve arrinin në shifrën rreth 700 milion euro në vitin 2008” vazhdoi ai, duke cilësuar se “këto të ardhura janë jo vetëm burim i madh investimesh për stimulimin e bizneseve vendase këtu në Shqipëri, por edhe një mbështetje e rëndësishme për jetën e shumë familjeve të varfëra, veçanërisht në zonat rurale, për nënat me fëmijë, për pensionistët dhe grupe të tjera të prekshme”. Me zhvillimet e shpejta që po pëson sot ekonomia globale, u shpreh ambasadori Bosch, “ka shumë që thonë se për vende të tilla si Shqipëria, efektet e kthesës globale po fillojnë dalëngadalë të ndihen, edhe pse në formë të kufizuar, në rënien e nivelit të remitancave e deri në kthimin e një pjese të emigrantëve në shtëpi”. Këto zhvillime, sipas tij, s’mund të kenë veçse ndikim negativ në sistemet e mirëqenies në vendet e origjinës. Me këtë rast, ambasadori Bosch iu referua fjalës së mbajtur nga Ministri i Brendshëm, z. Bujar Nishani në këtë konferencë, për angazhimin e autoriteteve shqiptare për të bërë gjithçka të mundshme për të mos lejuar zhvillimin e një situate të tillë. Konferenca, e cila i filloi dje punimet e saj, do të vazhdojë edhe sot. Ministri i Brendshëm, Bujar Nishani, i cili mbajti fjalën e hapjes në këtë konferencë, duke u ndalur tek tema kryesore , “Menaxhimi i Migrimit dhe lidhja e tij me politikat ekonomike, sociale dhe mjedisore në përfitim të stabilitetit dhe sigurisë në rajonin e OSBE-së” u shpreh se kjo është një nga çështjet me interes të lartë për rajonin dhe Shqipërinë, e cila ndër vite ka përballur dhe vazhdon të përballë sfidat e migracionit, duke krijuar edhe një eksperiencë të fortë, e cila na ka mësuar se migracioni është një problem kompleks dhe shumëdimensional.". Sipas tij, përmirësimi i kanaleve për migrimin legal dhe reduktimi i migrimit ilegal do të luftonte të gjitha aktivitetet ilegale të lidhura me këtë fenomen. "Në këtë aspekt-tha ai- një rol të rëndësishëm do të luante realizimi i një menaxhimi efektiv të përbashkët të kufijve dhe bashkëpunimi ndërinstitucional. Në këtë kuadër Shqipëria ka në zbatim strategjinë dhe planin e veprimit për menaxhimin e integruar të kufijve, përfshirë kërkesat e Ligjit të ri për Policinë e Shtetit". Ministri i Brendshëm nënvizoi edhe nevojën për ndërtimin e politikave dhe mekanizmave të përbashkët për menaxhimin e kufijve, sistemet e të dhënave dhe problemet sociale që lidhen me emigrimin në mënyrë që të arrihet në vlerësime të sakta të realitetit ekonomik, përfshirë parashikimet për nevojat e tregut të punës. Konferencën e përshëndeti ndërkohë Z.Alexandros Tziatzamis, sekretar për programet ndërkombëtare në Ministrinë e Jashtme të Greqisë, vendi kryesues i OSBE-së, si dhe Z. Goran Svilanovic, koordinator i OSBE-së për aktivitetet mbi ekonominë dhe mjedisin. Tziatzamis dhe Svilanovic, sipas burimeve të ministrisë së Brendshme," u ndalën në ndikimin e krizës së ekonomisë globale tek migracioni dhe nga ana tjetër ndikimin e kthimit të emigrantëve në vendet e tyre, në rritjen e numrit të papunësisë." Ata theksuan nevojën e hartimit të politikave të përbashkëta për gjetjen e zgjidhjeve dhe zbutjen e problematikës lidhur me këto çështje. Në të njëjtën linjë qëndroi në fjalën e tij edhe Ambasadori i OSBE-së në Tiranë Robert Bosch, i cili theksoi se "gjetja e politikave të përshtatshme të përbashkëta do të ndihmojë në menaxhimin e impakteve negative të krizës ekonomike globale dhe sigurimin e një zhvillimi të qëndrueshëm të vendeve burim të migracionit". Konferenca e radhës dhe kryesorja e OSBE-së për ekonominë dhe mjedisin do të mbahet në muajin Maj në Athinë, Greqi.

e dini ate shprehjen: i mbyturi s'ka dert nga te lagurit?
keshte eshte edhe rasti i shqiperise, ne eshte e ekspozuar ndaj krizes globale,
apo eshte zhytur ne krize